wuk ziej nog met je stiel van plan?
e carriere maken of bluvn rappen voe twintig man?
vragen overvoln me, wien wit woa da me ziel beland
Ik zien e mili-tant voe de liefde lik Kahlil Gibran

me leven stoa grotendeels up vinyl gebrand
en met me kladblok ek ondertussen e stabiele band
mo de wisselwerking met gedachten is fragieler dan
e kersebloesem ot de lentevorst nog e visite plant

der zien te weinig woorden voe me ut te drukken
mo zinsneden passen tegoare lik puzzelstukkn
ok me uten up e beat gif ek je mor e poar letters
mo me beeldspraak is glashelder lik bie woarzeggers

kzien e zwoarvdechter die het heft in eigen handn pakt
ze zeggn echte hip hop et te weinig andacht
mo fack da, echte hip hop is nie voe de massa
dus tis logisch dat er mor e kleine kring bluft bie de ambacht

voe mien is t’canvas e open veld vul met meuglijkheden
volut vul ek et met varioatie dak willn deuregeven
gedreven sleur ek derut wat dat er vanbinnen zat
ik schrievn met e penwortel, dus de impact

van me bodemloze verzen vergt e benoadering
die verder goat, dan je ervoaring beseft
Hip Hop, is nie van joen mo wel van us
want woa dan platen bluvn draaien en kraken vien ek ik me thus

ze willn dak, schrievn up die trapbeats en hi-hat-collecties
me flow simplificeren.. “amai zeg, zo technisch”
ok klappen, krieg je klappen lik e roos
oenverbloemd, gieder poppie lik papavers, mo wieder oendergroends

just lik rottende kadavers, en daw zoen achterhaald zien
is even logisch lik e Poolse Joodse neonazi
vergit et, en ja et tzit in smaken
mo kzie liever noois nie upgemerkt, dan met mumble rap e hit te maken

tis noois nie commercieel bedoeld gewist in et begin
omdat et rebelerende karakter doarvoorn moe krimpn
en verdwijnen up de achtergrond, nog mor e schim
van wat dat wos, up et moment dat angedreven is deur winst

ik geevn beats en schrifen kortsluiting met de stroom
van et eletrieke beentje in men elleboog
nie zomo weer e rapper, mor e lyricist die verzen stookt
in houten voaten en up oede ploaten zoekt no woa dat ie e sample oort

ot olles wegvolt, bluf juste nog t’schrieven over
en e beat die zorgt dat olles vlotjes up de track rolt
me hele ziel zit in die shit dus da me tekst molt
is evident, kzien 24/7 up e rap golf

kzien resistent tegen die pussyrappers die gin inhoud en
ze doent olleen voe fame en voer e vriendinne t’en
omdaze ook iets nodig en int leven da vuldoening gift
mor oj gin voeling stikt in et proces

ist noois nie authentiek of echt oj etwa rapt en das net etwa da gevoelig ligt
bie ik, ik zien fan van olles ot er mo gevoel in zit
mo kmissn, de latste tied de vibe van echt rijms
ik zien ze wa volsche schien uphoudn lik Hyacint Bouqeut

ken genoeg van ol die man, deurzichtiger dan lingerie
lik e kikker in et water kook ek ze au bain marie
ik slamn up beats lik e bezetene.. kvoeln mee met de oenwetende
kvergeevn ze, mo doarom ziej gie nog gin echt mc

tgoa vele verder dan wa regels spitten
tvoelt lik of dak heel me fucking leven in de ether smietn
kzien ol meer dan 15 joar bezig, nog ossan even gedreven
voe t’evolueren, kwiln elke dag inoveren en beter schrievn

Big up nor ol die dope rappers dient in leven oedn
under vastebieten in de stiel lik e bezeten hond
ik geevn joen me kostboarste item ok ik gevoelens droppn
zien we nie ol zo prikkelboar gelik e voodoopop

anno 2020… je mening moet int kotje passen
oj 1 gepaft et oenderweg toen meug j’int potje plassen
toffe gasten wi die flikken, vraag et Floyd mo
ieder uprecht en goebedoeld project wordt ier geboycot

ze zwaaien met lege scepters, en geevn echt om nietn
ze voeden je met angst en overloadn je met verdiet
je, ku nie veel anders dan te volgen met de massa
oj nie voe jezelvn ku beslissen wat dat er van afhangt

tis fucked up, mo fack da, tis kiekn no jezelvn
want in heel de wiede wereld kut er, niemand jen helpn
butn gie, dus ik zorgn voer ik en voe me noastn
ik zien chill an et genieten mo kzien heel de wereld hoastn

ze zien ossan onderweg, stoa noois stille bie situaties
tis groeien voe te groeien voe te endigen me noaties
onderworp an infloatie, an bubbels dien uteenspattn
ze spellen je de lesse, mo zen zelvn weinig leer-kracht

mo ze verkopen klasse, da verkopt beter dan kleerdracht
overschaduwen olles up de wereld die us 1 makt
mor 1 twa ku ze me noois beroven, das dak breedlachs
de dag startn, zodak stap voe stap komn toet eendracht

tgoa vele verder dan wa regels spitten
tvoelt lik of dak heel me fucking leven in de ether smietn
elke bar dak schrievn is e vezel van me ziel
dus past up oj ze oort ze zien redelijk fragiel