ik zien e dierevriend, kvoeln e connectie met de beesten
k’kun me hele overgeven op bepaalde hip hop feesten
kzien e fan van de muziek die me ku raken in me kern
ik kun me fascineren over zworte goaten in et cern

e sutra van Patanjali ku me geheel toet rust briengn
tis pas tope met me homies dakkke kunnen geluk vien
de groenten ut men hof, geevn me voldoening
ik kun rappe teksten schrievn mo ze moetn up t’gevoel zien

de regels van e virtuose schrieven imponeren me
de woorden, van e mens da zeer et breken me
tis up de zeemzoete jazz van Melody Gardot
dak klimn ut et panopticon lik bie et lezen van Foucault

de specifieke geure in de hoaren van me koater
doe me smelken lik up warme dagen douchen me koud woater
ik houden van et leven en de moeilijke momenten
want ze stellen me in stoat voe ook et goeie te ontdekken

ik zien verliefd op de lach van me vriendin
as ze straalt en eur gelukkig voelt up plekken diep vanbinnen
kzien dankbaar, da ze me ol die joaren ol ku dulden
dak toet snachts boeshido crashn, mo de middenweg is gulden

menshen lik Paul Stamets geevn me de hoop
dak nodig en voer in e schone toekomst te kun geloovn
en tzien de dingn da m’inspireren dak met junder wiln bespreken
an de rest giv ek ik gin aandacht mir en kvoeln me veel beter


Bepaalt je leven nie volgens e privatieve a
een alpha privativum is e negatief verhaal
identiteit moej kneden ut et gene da je ziet
nie de zaken woarin da je nietn van jezelvn vient

Bepaalt je leven nie volgens e privatieve a
een alpha privativum is e negatief verhaal
identiteit moej kneden ut et gene da je ziet
nie de zaken woarin da je nietn van jezelvn vient


ik geevn aandacht an de zaken dak zelve representeren
nie ant omgekeerde, woarom zoek me tijd doar an verspeeln
kleggn focus ut e goeie, up wa dak in geloven
nie up zaken die me van me positiviteit beroven

dus vermeld ek ik me helden, die me stimuleren
ol vermeld ok ook de hel, mo dad is nodig voe te leren
ojt op afstand ku beschouwen en resoluut relativeren
ist ook nodig, zolange daj nie begunt typeren

of daj tracht te identificeren ist opzich ok
up de hoogte zien, mo doarom kiek je nog nie nere
up een ander of iets anders woa daj nie mee resoneert
lat et voaren, gift je liefde an wat daj mee connecteert

gin privatieve a’s, gin asociaal gedrag
of apatisch, aversief, olle a’s kom up men af
mo tis om t’even, up dit moment lat ek ze mo paseren
gin negoatie’s mi olene nog negoaties gok negeren


Bepaalt je leven nie volgens e privatieve a
een alpha privativum is e negatief verhaal
identiteit moej kneden ut et gene da je ziet
nie de zaken woarin da je nietn van jezelvn vient

Bepaalt je leven nie volgens e privatieve a
een alpha privativum is e negatief verhaal
identiteit moej kneden ut et gene da je ziet
nie de zaken woarin da je nietn van jezelvn vient