je ziet et nerevoln in bodemrijke groend
twordt gevangn deur de wind en geslingerd in et roend
toet dat landt, up goe land, nie lange lanterfant
mo van dad eerste ruwe contact ze woare oard omarmt
up zoek no nutrienten, no kleine mineralen
en speciale ingrediënten nodig voer et startsignaal
H20, de bron van olle leven
is in evenwicht nodig zodat t’leven in da zadje zoe bewegen
en ontploffen, ontspruiten, en rustig wortel schieten
e vertakt systeem creëren da gericht is nor olbuiten
e gunstige relatie me bacteriën en schimmels
en de reste van de rit is even simpel
brekend deur de oppervlakte zoekend achter licht
achter warmte, dus ist ie no de zunne gericht
zen eerste echte blad briengt em de nodige proceskracht
toet dat ie plots torent en de andere plantjes wegzakkn
achter wa tied zien der riante blitse bloesems
en gezoem, van hommels dien et verse pollen proeven
en vervolgens, de vrucht in e verharde joenge stoat
die vul zit met antioxidanten en met hopen zoad
de zunne doet em blozen, ne zoe kun veugels voeden
toet up tpunt, dat de tak em niemi langer kut oeden
en dat de rijping is voltooid, t’process is afgeroend
vanaf dat de vrucht zezelvn et verwijderd van de stroenk
je ziet et nerevoln in bodemrijke groend
twordt gevangn deur de wind en geslingerd in et roend
toet dat landt, up goe land, nie lange lanterfant
mo van dad eerste ruw contact ze woare oard omarmt
der zien der nie zo vele, tis ossan tzeste zadje
dezeste grond en bijgevolg meestol et tzeste plantje
de cyclus is oeneindig, deurheen de atmosfeer
dus ieder zadje, plantje, beestje, mens is g’interconnecteerd
t’droait ollemaal in cirkels, concentrische spiraaln
t’gevoel van jen omgeving wordt verwerkt in je verhaal
tis ossan weer uniek, eenmalig of speciaal
mo tegliekertied, ist e patroon die em herhaalt
t’droait ollemaal in cirkels, concentrische spiraaln
t’gevoel van jen omgeving wordt verwerkt in je verhaal
tis ossan weer uniek, eenmalig of speciaal
mo tegliekertied, ist e patroon die em herhaalt
je ziet em upgroeien in e rusteloos gezin
mo nietn die em stopt, vanaf ze eerste vulle zin
spreekt ie boekdelen, t’leven deur de ogen van e kind
die nog nie wit wat dat de toekomst em nog ollemale briengt
up zoek nor informoatie, no kennis en creatie
hongering no e gezoende en gepaste stimuloatie
ant flirten met de grenzen van de communicoatie
ist ie em ant vorm, in reloatie toet ze situatie
ze lampe goat ant brandn, int schole ist ie mee
ol is nie ieder vak ze ding et ie wel meestol een idee
ze matjes en vriendinnetjes vien em e coole pé
mo bie em thus vien z’em up ze best gemoatigd of ok
achter wa tied lat da ze kloven in de vlakte
en bie’t ouder worden, wordt ze ze situatie thus ze zwakte
t’moment dat ie olene wilt go weun, en dat lukt
dat ie e meisje vient die tope wilt up zoek goan no geluk
got et mis, net noois geleerd van liefde te ontvangen
of der te geven, ofja ffkes, mo vaak voe nie te lang
ze kriegn tope e kindje, e lach, e glim
mo der zien pitten woa dat lastig is voe zomo ut te klimn
dus je ziet em upgroeien in e rusteloos gezin
mo nietn die em stopt vanaf ze eerste vulle zin
spreekt ie boekdelen, t’leven deur de ogen van e kind
die nog nie wit wat dat de toekomst em nog ollemale briengt
we zien ier me zoveeln, mo voeln de zeste woede
we zien dezeste zunne en we voeln dezeste koede
de cyclus is oneindig, deurheen de atmosfeer
wat dat em ooit et ogespeeld et kanse te reïtereren
t’droait ollemaal in cirkels, concentrische spiraaln
t’gevoel van jen omgeving wordt verwerkt in je verhaal
tis ossan weer uniek, eenmalig of speciaal
mo tegliekertied, ist e patroon die em herhaalt
t’droait ollemaal in cirkels, concentrische spiraaln
t’gevoel van jen omgeving wordt verwerkt in je verhaal
tis ossan weer uniek, eenmalig of speciaal
mo tegliekertied, ist e patroon die em herhaalt