t’leven dumpt us soms in barre situaties
mor e diep dal is vaak e kanse toet e transformatie
vernieuwt jezelvn, wachten briegnt je zelden innovoatie
want succes zit in successie en we groeien deur de reloaties
da we vormn, we voeln us vaak bedrogen
zien e bron van inspiroatie mo toch liek et woardeloos in eigen ogen
we zien zelden de betekenis dam en
zoen us oenafwendboar verliezen tussen ol de botte stemmn
in us hoofd, de druk voe te presteren werkt verlammend
en verdovend, zeker ot er weinig man in je geloven
je zelve nog de grotste skepticist ziet die twiefelt
of daje wel in stoat ziet voe je zelfbeeld bie te beiteln
soms is de tied nie meer dan zout in open woendes
en oe kommet damme soms deugd voelen bie uze zoendes
we willn, wa damme willn is bijzaak, we willn
en goan ook olles der an doen voer us verlangn nor iets te stilln
nim jet me kwalijk? kzien ook geweune vlees en bloed
up zoek nor e maniere voe te leven die gin zeer mi doet
en soms, zien der van die wegels daj olene moet
trotseren en proberen los te loaten wat daj t’meeste zoekt
we leern pas de haat kennen achter verliefd te zien
zien zo verliefd daw olles haatn da nie up uze liefde liekt
tis roar e, we haten soms zo zwoar
da we verliefd zien up de haat up et moment da’t gehate verlies ervoart
oe zoew toen trachtn van die zaken ooit te snappen
on we us bie elke trede up e fout stap betrappen
on we peizn, gedachten en mo woarde in e context
kzien nie up zoek no shortcuts, mo peizn is de omweg
tis goan, doen, ol zie je zo utstekend geniaal
ist er e grote kanse daj nie wordt begrepen
talent is overschat, et enigste da telt
is daj de dingn doet da jen erte tegen je vertelt
Lat je nie doen, stoa rechte voe jezelvn
gie ziet de persoon die je et best kut helpen
lat je nie kennen, doet elke ki je beste
want tleven got noois stoppen met us te testen
lat je nie vangen, ziet ossan up je hoede
en tracht de boas te bluvn over stress en woede
lat je nie doen, ol liek et tevergeefs
ist ossan de moeite da je et tenminste wilt probeern
t’leevn dumpt us soms in barre situaties
mo we zien der up voorzien via acclimatisoatie
we veranderen en passen us an, in correloatie
met tgevoel dat in us zit, azo bluvn we in rotoatie
dus gift nie up van eerste ki, je makt progressie
tis erhaaln dak doen mo succes zit in successie
tis d’herhaling van e handeling die leidt toet de impressie
van talent bie elke stap verbert je connectie
met etgene daj ant meesteren ziet, das de verkloaring
dat nie ossan goat om skills opzich, mo de ervoaring
deur de joarn die em upstapelt en iets concreet vormt
nie upgeven is de sleutel toet compleet komn
want kzien 33, up me voorhoofd ek rimpels
kzien joengk van geest, k’kun mien da veroorloovn
kbedoeln geweune ma
ik voeln me nog ossan e leerling in elke discipline dak betrachten
en peist nie, dat er met verlichting niet ku misgoan
want oje in de zunne stoat wordt je schaduw zichtboar
dus lat je ook nie vangn, an perturboatie
t’succes van die successie is verboendn met moderoatie
dus zoekt balans ol moej soms weg en were wippen
met e consistente houding zit je rappe weer int midden
gift nie up, vulharding is een van de grotste deugden
die us automatisch briengt tot vergenoegdheid en vreugde
probeert dus nie verslaafd te worden an je slicht te voeln
want je slicht voeln is herkenboar
en voelt dus doarom vaker veiliger dan etwa nieuws te goan proberen
mo die veiligheid is niet wérd oj zit te creperen
doet dus je beste, gif et nog e - kanse
der zien veel obstakels voe te komn toet wa balanse
en die stoat is nie oenschendboar, mo redelijk fragiel
mo bluft voer heel je leven sluimerend aanwezig in je ziel
Lat je nie doen, stoa rechte voe jezelvn
gie ziet de persoon die je et best kut helpen
lat je nie kennen, doet elke ki je beste
want tleven got noois stoppen met us te testen
lat je nie vangen, ziet ossan up je hoede
en tracht de boas te bluvn over stress en woede
lat je nie doen, ol liek et tevergeefs
ist ossan de moeite da je et tenminste wilt probeern
